មហាវិទ្យាល័យវិទ្យាសាស្រ្តកសិកម្ម គឺជាមហាវិទ្យាល័យមួយនៅក្នុងវិទ្យាស្ថានជាតិ​កសិកម្មកំពង់ចាម។ មហាវិទ្យាល័យវិទ្យាសាស្រ្តកសិកម្មបានដំណើរការបណ្ដុះបណ្ដាល​និស្សិតតាំង​ពីឆ្នាំ១៩៩៥ ក្នុងកម្រិតបរិញ្ញាបត្ររងបច្ចេកទេសកសិកម្ម រហូតដល់ឆ្នាំ២០០១ ស្របនឹងសាលាជាតិក​សិកម្ម​​កំពង់ចាម ប្រែក្លាយទៅជាវិទ្យាស្ថានជាតិកសិកម្ម កំពង់ចាម មហាវិទ្យាល័យវិទ្យាសាស្ត្រកសិកម្ម បានបើកដំណើរការបណ្ដុះបណ្ដាលកម្រិតបរិញ្ញាបត្របន្ថែមទៀតលើជំនាញក្សេត្រសាស្ត្រ។ ចក្ខុវិស័យរបស់មហាវិទ្យាល័យ គឺប្រែក្លាយគ្រឹះស្ថានអប់រំមួយ មានគុណភាពខ្ពស់ក្នុងកម្រិតស្តង់ដារជាតិ និងមានការទទួលស្គាល់ដោយអន្តរជាតិ តាមរយៈការអប់រំបណ្តុះបណ្តាល ការស្រាវជ្រាវ និងការផ្សព្វ​ផ្សាយ​បច្ចេកវិទ្យាកសិកម្ម។

បេសកកម្មចម្បងមហាវិទ្យាល័យគឺផលិតធនធានមនុស្សដែលមានសមត្ថភាពខ្ពស់ក្នុង    វិស័យវិទ្យាសាស្ត្រកសិកម្មដូចជា គ្រប់គ្រងជីជាតិដី បច្ចេកទេសដាំដំណាំ វិទ្យាសាស្ត្រគ្រប់គ្រងដាំដំណាំ និងឥរិយាបថចេះធ្វើការងារជាក្រុម ។

មហាវិទ្យាល័យវិទ្យាសាស្រ្តកសិកម្ម គឺជាគ្រឹះស្ថានសិក្សាដែលមាននូវធនធានមនុស្ស​មាន​សមត្ថភាព ទេព្យកោសល្យក្នុងការបង្រៀន ការអនុវត្តន៍ជាក់ស្តែង ការសិក្សាស្រាវជ្រាវរបកគំហើញថ្មីៗ និងការផ្តល់សេវាគាំទ្រដល់និស្សិត និងសហគមន៍ប្រកបដោយគុណភាព។